Бар саналы ғұмырын білім мен ғылым жолына бағыштап келе жатқан ғалымдардың бірі Қозыбақов Бейбіт Ақынбайұлы Алматы облысы қазіргі Райымбек (бұрынғы Нарынқол) ауданы Жамбыл ауылында 1954 жылы 27 ақпанда дүниеге келген.
Б.А.Қозыбақов Қазақстанның оңтүстік-шығыс аймағында шығарылған қазақтың биязылау кроссбред жүнді қой тұқымы авторларының бірі (1994), ауыл шаруашылығы ғылымдарының докторы (2010), Халықаралық ақпараттандыру академиясының академигі (2012), ауыл шаруашылығы малын өсіру, олардың селекциясы, генетикасы және көбеюі саласының жетекші маманы.
Бейбіт Ақынбайұлы орта мектепті бітірген соң (1970), бір жылдай Текес ауылында малдәрігерлік санитар болып жұмыс істеп, шаруашылық жолдамасымен Семей зоотехникалық-малдәрігерлік институтының күндізгі бөліміне оқуға түсіп (1971), аталмыш институтты «зоотехния» (зооинженер-технолог) мамандығы бойынша бітіріп шыққан (1977).
Жас маман ретінде Ұлттық ғылым академиясының Эксперименттік биология институтына аға лаборанттық жұмысқа қабылданып, жемісті еңбегінің арқасында жетекші ғылыми қызметкерлікке дейін көтерілді (1977-2006).
Академиктер, Ф.М.Мұхамедғалиевтың, кейіннен М.М.Тойшыбековтың жетекшілігімен Қазақстанның оңтүстік-шығыс өңірінде мол өнім беретін жаңа қой тұқымдарын шығару, оларды жетілдіру, өндіріске енгізу, тарату, малдың төзімділік деңгейін анықтау, олардың бағалы түрлерін, топтарын өсіру, ұяң жүнді сарыарқа құйрықты қойының ұрпақтарын өсіріп-жетілдіру, дамыту бағытындағы күрделі ғылыми-зерттеу жұмыстарын жүргізіп, жетекшілік қызметтер атқарды.
